È notte e s’allamentano

sotto a ’stu viento ’e piante:

chiano ’ncielo s’appicciano

’e stelle tutte quante.

’Sta voce ’int’a nuttata

mette malincunia:

’na pianta s’è spezzata

…me pare ’a vita mia.

’Na pianta piccerella

…ca nun ha dato frutte

sulo qualche frunnella

…cheste so’ ’e morte brutte!

È maggio n’atu poco e fore chiove:

me pare vierno invece ’e primmavera,

fa pure friddo, che ghiurnata nera,

sto nchiuso dinto a leggere e a fumà.

Lampeja verso ’o Vesuvio: ma a punente

ce sta ’na fascia ’e cielo ch’è serena:

s’affaccia chianu chiano ’a luna chiena

…dimane primmavera turnarà!

Carulina ha fatto ’ammore

cu Giruzzo ’o Prucitano

ma ha passato n’anno sano

sulo a chiagnere e a sperà.

A sperà, commo se dice

ca Giruzzo areto ’o muro

qualche sera, dint’o scuro

l’essa fatto cunzulà.

’Mmece niente e ’a puvurella

doppo lacreme e dulore

pe’ nun dà ragione ’a ’o core

’etta afforza malignà.

Ne parlaie cu ’na cummara

ca dicette "Figlia bella

ato c’ommo! ’Na vunnella

si t’o spuse l’hai accattà!"

E, cunvinta e addulurata

Carulina ’o licenziaie.

"Femmenella? Nun sia maie

certo, meglio e s’a sciuscià!"

Se capisce ca Giruzzo

muorto ’e scuorno, scuncertato

chissà ch’essa cumbinato:

nu maciello la per là.

Po’ ’o buon senso, ’a cumbrensione

se ne ghiuto a dint’o vico

mo’ sta ’e casa cu n’amico

ncoppo ’o Ponte a Sanità.

Ma, venimmocene a nuje

sulo pe sudisfazione

s’ha fiuto e ’na racchione

ch’è nu schifo, ’na pietà.

Carulina s’è stupita

nun credeva a chistu fatto:

l’ha cacciato all’intrasatto

…scienza, spirito, bontà?

S’ha pigliato cu ’a cummara

ca dicette "Figlia bella

ato ch’ommo! ’Na vunnella

si t’o spuse l’hai accattà!".

È venuta dint’o vico

’na figliola l’autriero

(saccio ’o nommo e nun ’o dico

pe’ duvere, p’onestà).

Cu duje uocchi niri e belli

chini d’ombra e de dulore

ha cercato ’e Salvatore

Tore, ’o figlio d’o Pascià.

L’ha risposta Nanninella

’a mugliera, cu nu sgarbo

e ’a figliola, puvurella,

è svenuta là pe’ là.

Donn’Amalia l’ha pigliata

l’ha purtata fore ’o vascio

e cu’ Peppe ’o masterascio

ha cercato d’aiutà.

"Songo incinta, è stato Tore"

cu nu filo ’e voce ha ditto

"mamma è morta p’o dulore

ma ce l’aggio fa pavà!"

Tutto ’nzieme Tore passa

guarda… po’ fa finta ’e niente;

va siscanno indifferente

nu motivo ’e tiempo fa.

Zompa ’a giovane e ’o dà ’ncuollo.

Quattro o cinche curtellate

"Te l’è proprio ’mmeretate

me faje schifo, no pietà!"

"Ma m’e mmereto pur’io"

dice e, zacchete!, s’accide

po’ cadenno allucca "Uh Dio!

L’ate nun hanno pavà!"

Da ’o detillo piccerillo

sfila ’aniello cu ’o brillante

(bello, costa chissà quante!)

e fa segno ca ’o vo’ dà.

"È pe’ figlie ’e stu ’nfamone"

dice mentre ca ’o cunzegna

’mmano a Giro ’o spaccalegna

"e facite studià".